نصائح من ذهب اذا ذهبت بالوقت الحالي الى سوريا

لمن يريد الذهب الى سوريا من المانيا او اوروبا 

1- اذا جاي مشان تشوف أهلك بعد سنين الفراق وتشوف البلد وهي حرة عزيزة وتشهد مظاهر عزة الله ونصره وسقوط أعتى أنظمة الاستبداد والإجرام في العالم رح تشوفها جنة من جنان الله في أرضه✌️

#اما اذا جاية سياحة واستجمام وما بيعنيلك ولا بهمك كلشي صار فبنصحك تروح على جزر الكناري رح تنبسط فيها اكتر!!!!!

3- اعمل حسابك انو الكهربا معدومة تقريباً.. بتجي ساعتين باليوم كله.. الناس بالبلد تأقلمت مع الوضع وصار في عندهم بطاريات وبعضهم ركب نظام طاقة شمسية.. بس حاول ما تجيب قمصان أو شي بده كوي لأن رح تتعذب فيهم.. جيب معك Powerbank للموبايل

5- الجو هلأ برد كتير!!لا تقول جاي من أوروبا ومتعود😉 البيوت بأوروبا فيها نظام عزل متطور وما بتشعر بالبرد أما بسوريا البيوت باردة.. بس بفضل الله حالياً المازوت والغاز صاروا متوفرين وبأسعار مقبولة👍

6- جيب معك شنطة صغيرة.. لأن الجزدان (المحفظة) بدك تنساها تماماً.. بدك تتعود تحمل رزمة نص مليون ليرة من فئة ال 5000 .. الأرقام الي كنت متعود عليها (اذا صرلك زمان متلي) صارت مضاعفة هلأ ورح تتعذب بالبداية لتستوعب الوضع الجديد..

7- اذا بتقدر تحول اليورو للدولار بكون أفضل لأن تصريفه بسوريا صعب.. حالياً السعر نزل كتير (هبوط وهمي) بس عم يتعدل شوي شوي

8- لا تدفع للتكسي والمطاعم أكتر من التسعيرة المتعارف عليها! لا تقول حرام خطي خليني ساعد الناس.. بهالطريقة رح تخليهم يرفعوا السعر على الناس الي بالبلد.. ال 1000 ليرة (حوالي 10 سنت) ما رح تأثر عليك بس رح تأثر عالناس هنيك.. اذا بتحب آخر شي عطيه بخشيش او تصدق فيهم لشي محتاج..

9- رجاءً رجاءً .. لا تلبس ماركات غالية وتمشي فيها بين الناس.. شعبنا عزيز وكريم بس الزمن جار عليه وأكتر من 90% صاروا تحت خط الفقر! رجاءً خلي لبسك طبيعي احتراماً لمشاعرهم.. وتذكر انو هدول أهلك وهي بلدك.. انت مو سائح أجنبي!

10- الناس تعبانة ووضع البلد تعبان.. بس رغم هيك متفائلين كتير وعندهم أمل كبير بالمستقبل عكس الي بتشوفه عالفيسبوك.. خليك إيجابي وانشر الأمل بينهم.. لا تقعد تقارن بين سوريا وبلد غربتك.. الناس بحاجة أي أمل وتفاؤل.. مافي داعي تكذب بس قلهن انو بإذن الله البلد رح تعمر متل ما عمرت ألمانيا وهولندا وتركيا وكل أوروبا بعد الحرب✌️✌️✌️✌️✌️✌️

(يوميات لاجئ في المانيا)